打工仔遞信之後，老闆們真情又好，假意又好，都會作出一番挽留。但原來在下屬耳中，以下這些老闆的肺腑之言(簡稱：廢言)實在極度「哽耳」！到底員工心聲又如何？以下是十大經典老闆挽留廢言：

1. 一直好欣賞你表現，我都舖緊路畀你上位。我平時安排啲特別task畀你，就係想你喺呢啲方面可以突出！

員工心底話：咦？原來將無人肯做嘅豬頭骨拋畀我，背後有咁偉大嘅理由，真係多謝晒！

2. 嚟緊下年會調整番(人工)，同埋我會加你入晉升名單。

員工心底話：下年？不如等埋發叔添？真係你等埋我嗰份！(對唔住發叔，小朋友唔識世界，有怪莫怪！)

3. 我哋條team其實已經in緊其他candidates，你唔需要擔心人手問題，將會有其他新同事幫手減輕workload。

員工心底話：其實你最唔Care我走......

4. 其實我做咗咁多年老闆，發覺咗一樣嘢，就係凡係跳嚟跳去嘅員工，整體薪酬都唔夠一直留喺度做嘅員工高，所以長遠嚟講，jumpy嘅同事會人工唔高，甚至跳吓跳吓發覺無人請。

員工心底話：其實今時今日靠嚇呢招已經唔work，經驗話我知，真係魚唔過塘唔肥！

5. 呢排手頭上咁多projects，你走咗，阿朱阿苟點算啊？佢哋好慘㗎喎！你可唔可以做多一個月，等其他人完咗手上projects先走？

員工心底話：Sorry，人情牌對我真係唔work，阿朱阿苟忙到甩轆關我叉事咩？除非我出埋佢哋份糧喇！

6. 其實成team人入面，你做得最好，阿朱阿苟喺邊啲邊啲方面都唔夠你好！不如你留低幫幫手啦？

員工心底話：但點解我係成team入面人工最低嗰個...嗚嗚...

7. 我哋嚟緊有restructure，到時大把機會比你！

員工心底話：歌都有得你唱啦：「下次，下次，下次大概可以～」仲信嗰個真係白癡！而且，restructure完，我都唔知仲喺唔喺度......(哭)

8. 你走嗰時記住同HR講，啲數要計返落我度！

員工心底話：我辛辛苦苦跑嘅數，我走就算丟落公海都唔益你！

9. 你想轉back office 唔早啲同我講？我識大把人！

員工心底話：多謝夾誠惠，你唔踩多我一腳已經偷笑！

10. 你走咗，呢幾年嘅努力咪白費晒？完全浪費晒㗎喎！走到去，咪要由零開始？

員工心底話：老闆，如果喺「0.01」同「0」之間計算，我睇唔到好大分別......

其實老闆們如果無錢/無心/無力留人，講咁多廢話，倒不如一句「我從來唔阻同事發達，祝你一帆風順！」嚟得瀟灑痛快！

撰文：

溫柔

欄名：銀行小妹甩轆記