「我要cut咗呢個自動轉帳！」

中午，一身恤衫西褲的男人怒氣沖沖衝入分行，手裏高舉一張月結單。

女同事見狀，立即迎上，問：「先生，有咩幫到你？」

「我係XXX區議員，我而家收到市民求助，簽咗間呃錢美容院套餐，我要幫佢cut咗呢個美容院嘅分期供款！」他隨即把手裏的信用卡月結單塞向女同事，「嗱！你幫我搞掂佢！」

女同事一聽，知道不可能做到，立即耍手擰頭：「唔得，呢啲係同商戶簽咗agreement，唔cut得！」

「你銀行咩條例，咩條款寫到明唔做得嘅？你講我知啊！」議員說畢從褲袋裏掏出一枝錄音筆，「我而家會錄低晒你哋銀行嘅答覆！」

女同事見議員樣子兇狠，亦醒目地找外援：「哦，咁你等等，我幫你打去Card centre問吓。」

電話接通，女同事開啟揚聲器，信用卡中心同事先同議員核對身份：「請問先生係咪卡主本人？」

「我唔係，我係區議員，我幫市民處理嘅。」

「哦，咁唔好意思，為咗保障客戶隱私，我哋只接受卡主本人查詢......」基於議員並非戶主本人，信用卡中心同事只可以回答一般條款。

掛綫後，議員深深不忿，逐向女同事咆吼：「你哋咁大間銀行，都唔保障客戶嘅？！你快啲處理咗佢啊！......(下刪一千字)……」

女同事受不了這樣的脅逼，嚇得哭了出來。議員不為所動，繼續鬧，鬧足半個鐘，一直看着女同事喊。

後來，一英勇男同事實在看不過眼，立即向經理請假。只見他獲批請假後，除下領帶，不徐不疾走到區議員面前，厲聲責問：「我而家以呢一區嘅市民身份問，我 可 以 點 樣 投 訴 你？！」

議員料不到會有人突然跳出來做「架両」，頓時語塞，「你……你咩意思啊？」

「我而家有合理理由懷疑你，你執到其他人張月結單，然後去銀行套取佢嘅個人資料！所以，我要投訴你！」男同事瞪着議員，再次強調。

議員自知理虧，即刻「雞咁腳」落荒而逃，事件最後不了了之。

從此，當我在街上見到議員的「成功爭取XXX」橫額，不禁想，是否有需要改為「成功爭取Common Sense」呢？

(以上內容由阿強講述，溫柔撰寫。）
作者Facebook專頁︰90後銀行小妹甩轆記

撰文：

溫柔

欄名：銀行小妹甩轆記