【銀行小妹甩轆記】紅顏一笑
最近無咩數,頻臨被炒邊緣。點知,比比鳥RM突然話有「好嘢」益我:「阿妹,佢話想買兩球基金啊!你幫幫佢。」嘩,知道我無數,就送個客畀我,簡直係真愛啊,哈利 !
雖然我估佢平時應該有暗戀我,但估唔到會咁直接,點算好,之後應唔應該......
「小姐?小姐?」
啊?正當我幻想緊嘅時候,個客已經坐低咗,我就即刻問:「先生,你想買咩基金啊?」Come on,Babe!我成個貨架嘅基金等緊你!
「盈富基金。」
「......」我即刻「O」咗嘴,02800?!你玩我咩?!
作為專業銀行職員,我保持冷靜,微笑答:「哦,咁唔緊要啊,先生不如你比張身份證我check吓?如果有股票戶口,就買得盈富基金㗎啦。」
佢無嘗試過搵張身份證,就話:「呀,如果我比個戶口number你又得唔得啊?」
「哦,咁好啊,你比我睇下。」
然後佢俾咗個水蛇春咁長嘅number我,咦,唔多對路喎,唔似係我行嘅戶口號碼嘅?
我皺晒眉頭:「咦,先生啊,check唔到,個number好似唔啱......」
「哦,係啊,個number係失眠銀行㗎!」
「但我哋係甩轆銀行喎!」係咪玩嘢啊?!
「吓?你咪喺我個失眠銀行戶口攞錢囉!」
「甩轆銀行攞唔到失眠銀行戶口嘅錢㗎!」
「咁啊,咁你幫我喺揸兜銀行戶口度攞錢啊!」
「呢度甩轆銀行嚟㗎,除咗甩轆銀行戶口,其他銀行嘅戶口我攞唔到錢㗎!」
「哦,咁唔緊要啦,你同我喺揸兜銀行戶口攞錢啦!」
「......」
佢邊講,邊拎咗張voucher出嚟,自己簽名,再遞畀我。而我見到個簽名係寫住:「聖母萬福瑪利亞」,真係睇到我眼都凸埋。
睇怕我都係遇上院友,最後我忍唔住話:「先生,我諗我真係幫你唔到,呢度攞唔到錢。」
然後,佢繼續好認真,而又九唔搭八咁問咗句:「咁請問你地最近嘅安信兄弟喺邊度?」
去到呢刻,我終於忍唔住「唧」一聲笑咗出嚟!佢一見到我笑,就講咗句「原來你都幾忍得笑!」然後就走咗去。
可惡,估唔到今時今日仲有人無聊到走入銀行同我玩「忍笑」遊戲!其實如果香港無人餓死、如果我哋年輕一代能夠睇得到未來、如果無咁大跑數壓力......我又點會唔笑呢?!
欄名:銀行小妹甩轆記