近日，身邊突然出現不少「大喊十」，全部因為個市冧，影響自己份工或投資，蝕入肉，所以日呻夜呻，日怨夜怨，日賴夜賴。

明白嘅，明白嘅。呢種心情，稍稍有打工或投資經驗的「老戰士」，有誰不知，又有誰未經歷過？情緒發洩，是要的，否則谷爆。

但是，發洩完，一定要回歸理性面對現實！因為，根本無人會同情你甚或可憐你。成人世界的鐵律，一定是：食得鹹魚抵得渴，打甩門牙帶血吞！

小弟生長在舊式中國人家庭，對男性要求，百份百要堅強：男兒有淚不輕彈，流血不流淚。所以，十分鄙視軟弱。你遇事失敗變大喊十？不單無人會呵護，反之，分分鐘換來兜巴星，星到你醒覺現實中的「森林法則」。

真實世界中，有幾項永恆定理：（一）唔蝕得，勿投資；（二）唔輸得，勿比賽；（三）唔炒得、勿打工（自己做老闆啦！）；（四）唔執得，勿營商。

聽落，好似冷酷無情。不過，愈遲開竅，愈遲接受（有得唔接受咩？），就愈痛苦。

香港人，尤其男性，多愛成功，又愛認叻，更個個夢想發達，故十之七八會投資，包括股票、物業，及真真正正搞一盤生意。

弊在，人性及無知使然，大部分拿出真金白銀去「尋夢」時，皆只往好處看，即只諗Upside，賺到錢就點點點。就我觀察，十個無一個會懂得開波前就諗downside，即蝕大本又或無生意可能要執笠時會點點點?

更天真者，以為自己眼光蓋世，定必有賺無蝕，走去借錢投資。結果……大家問問身兼「投資者」的資深打工仔就知，第一，若投資真的賺梗/好賺，就無人捱份牛工啦。第二，當然十之七八在投資路上血跡斑斑，不停「交學費」。

最近，「黑天鵝」出現，正好給予所有「天真族」開開眼界。原來，世情是會如此殘酷的。

強者必會繼續上路。弱者，一世做「大喊十」，長期扮演Loser可也。

撰文：

曾智華

欄名：有盈退休