特約

財叔 - MPF一條龍為退休做準備

而家好多人都濫用左財務自由,將財務自由當左係發達嘅途徑,其實財務自由係唔需要用被動收入(人工)去支持你嘅基本開支,就要首先控制你嘅基本開支,之後就要去計劃你嘅飛被動收入(例如租金,利息等),有好多人都忽略咗強積金,以為強積金係一件好長遠嘅事,但係其實佢對你嘅退休生活係好有影響,所以選擇強積金嘅時候要好小心,一般我認為揀選強積金可以分為三個階段,第一個階段係進取,第二個階段係中等風險,而係接近退休我10年就應該比較保守,唔應該因為市場變化而去隨便更改強積金計劃,好似係沙士嘅時候,有好多人將股票基金,轉為債券基金,咁其實係好錯,因為遲咗嘅價位好難追得返。另外如果覺得自己投資唔叻,亦可考慮強積金特別自願性供款,回報應該比自己更好,而且有靈活性,可以解決不時之需。

我講過要達到財務自由最重要嘅係控制基本開支,以基本開支之中最難控制嘅就係醫療開支,所以應該及早計劃一下財務自由或者退休之後嘅醫療安排,雖然政府推出左自願醫保計劃,但係個保障其實唔足夠,所以可以考慮吓某啲公司嘅醫療計劃,保障比較全面,但係記住買醫療保險係以實用為主,千祈唔好將扣稅放咗喺大前題,同時買醫療保險最好喺越年青買越好,到退休先諗可能已經買唔到或有好多不保事項。提到扣稅,其實政府亦推出左可扣稅自願性供款(TVC)及合資格延期年金(QDAP),大家如果想為退休作更多準備,就可以考慮善用這些工具,同時又可以慳稅。

至於到退休嘅時候強積金應該點樣安排呢,而家強積金業界同政府積極研究緊參考一啲外國嘅計劃,如提取收益產品(drawdown fund)、絕對回報基金等。提取收益產品容許成員定期定額提取資金,其餘資金會繼續投資,意思就係退咗休嘅時候唔一定將全部金額提取,可以保留部份係MPF的平台上收息,咁就可以製造到非被動收入,應付基本日常開支。始終退休之後都唔應該再去冒太大風險投資,所以揀選安全和穏健嘅回報嘅投資好重要。

因此年青人唔好以為強積金係好長遠嘅事而忽略左,應該多留意有關強積金所推出之新產品,因為呢個係終生嘅投資,就算退休之後仍是持續。

 

具國際視野的投資理財雜誌,請讚好iMoney智富雜誌Facebook