【Econ記者】聯儲局縮表 港息升唔升?
本周最重大嘅財金新聞就當然係聯儲局議息,因為大家都相信聯儲局會係今次會議啟動縮減資產負債表的行動(或者最少都會定下確切的啟動日期)。對於香港讀者來說,縮表的一個重要影響,是到底香港利率能否因而追近美國的利率。
簡單重溫一下香港利率制度的基本運作。因為本港採用聯匯,港元利率與美元利率理論上不可以有顯著的分離,如果美元利率高於港元利率,在香港這個資金自由流動的地方,大量資金就會投向美元利率市場,令港元貸款的供應減少,理論可以拉高港元利率,消滅港美利率價差。簡而言之,香港利率制度中的利率調整工具,正是聯滙。
但自從聯儲局2015年底加息以來,港元息率與美元息率一直存在差價。以1個月期的香港銀行同業拆息(HIBOR)的港元拆息與1個月期倫敦銀行同業拆息(LIBOR)的美元拆息的息差為例,現時LIBOR較HIBOR高0.75厘。
這個情況並不「正常」,但成因不難理解。金融海嘯以來聯儲局以量化寬鬆(QE),這個「不正常」的貨幣政策工具來刺激實體經濟,結果是聯儲局手上資產大幅膨脹的同時,美國銀行體系中的銀行儲備量亦倍增,術語的講法是金融體系的流動性過多,簡單的理解就是現金氾濫。而香港受到美國「傳染」,銀行體系都有相似嘅情況。
現金過多有咩問題?於利率控制上,就係當間間銀行都有大量現金嘅時候,銀行就唔太需要向其他銀行借錢「應急」;而HIBOR及LIBOR之類的銀行同業拆息,就係銀行之間互間借錢時的利率,所以,現金太多的副作用就係呢類銀行拆息會偏低。
但你會問:「美國個利率有升喎? 香港做咩唔升啊?」其實聯儲局係採用一個新的工具去確保利率可以隨著其指揮而上升,就係新設一個叫RRP的逆回購儲備工具,銀行及貨幣基金等合資格金融機構,可以將手上的現金存入聯儲局,並可以收到由聯儲局定立的利息回報。
金管局缺機制調控及更新
神奇的地方就係,理論上銀行同業拆息係唔會低過聯儲局RRP所提供的利率。試想一下,如果銀行同業拆息低過存錢入聯儲局的利率,所有銀行都會寧願將錢存入聯儲局,因為借錢俾其他銀行有風險,但借俾聯儲局無喎!聯儲局可以印銀紙還錢!就係憑呢個簡單機制,聯儲局成功為美元拆息設定下限,而只要上調這個利率,美元利率就會隨之而上升。
咁同香港有咩關係?問題就係金管局並無因應聯儲局的新制度,而去更新本港的利率操控機制,即是無為銀行拆息利率設定一個理論下限。現時美國成功做到將銀行水浸同美元利率分離,不論銀行流動性點樣過剩,依然唔會影響到加息步伐;反觀香港銀行水浸,就繼續令港元利率升極都升唔起。
當然,我唔相信金管局會改變其運作機制,該局只會繼續現時以不定期發行外滙基金票據來減少香港銀行體系入面的多餘現金。要解決港美利率息差,就可能要等聯儲局抽走全球的多餘美元。依家聯儲局要縮表,正正就係邁向這個方向的一大步。到底縮表對港元利率有幾大影響力,是個有待研究的有趣題目。