港股去到新一年，先嚟一個14連升，升到周一（15日）先斷纜，指數同2007年高位僅600點之遙。

但係望真啲，點解部分傳統藍籌股股價好似仲係原地踏步？為咗查明真相，小妹即刻喺彭博度Cap埋圖同大家一齊研究。2007年10月30日，恒指最高升到31958點，我地用呢日做指標，睇下恒指成份股喺呢10年變成點。

結果係，近10年升超過2倍嘅股份，只有長江基建（01038）當時係屬於恒指成份股（騰訊控股（00700）2008年6月先公布被納入成份股），而且長建2008年6月已經被踢走，到2016年再重新納入成份股，其他全部屬於後起之秀。

咁其他當年嘅成份股呢？10年升超過1倍嘅股份得7隻（綠色框框），當中竟然包括「公用三寶」，即係中電（00002）、煤氣（00003）同電能（00006），加埋港鐵（00066），充份印證公用股長揸無死錯人嘅定律。

買地產股慘過買樓多多聲

近年樓價升得快過火箭，以為揸地產股會行運？你就想呀！除左九倉之外，本地地產股得恒基地產（00012）有逾50%升幅，新鴻基地產（00016）同期亦升22.8%，叫做靚仔少少。其他發展商表現就更加不堪入目，專投貴地嘅信和置業（00083）同好鍾意幫年輕人置業嘅新世界發展（00017），股價期內分別跌超過6%同22%，完全跑輸樓價。

大價股又點？中移動（00941）同滙豐（00005）之前都有同大家提過表現麻麻，反而港交所（00388）同期有超過四成升幅，拍得住國有內銀股走勢。
較特別嘅係，表內走勢最差的15隻股份入面，有13隻喺2007年已經係成份股，都反映出呢堆所謂藍籌入面仲有唔少瘀血。

註：股份變幅以彭博數字為準，未計算期內股份派息等因素

#長揸公用股

#無買騰訊平保會跑輸好多

#買領展都升5倍呀陰功

撰文：

花生小姐