每年踏入11、12月，都是最多人結婚的月份。

去飲，假如同枱賓客都不太認識，是一件很悶的事情，但直至我在這次婚宴遇上他......

「Hi，Bella！」一個外表斯文的男人與我打了招呼，便逕自坐在我身旁的座位，問題是，我不認識他！

「你係......？」

看著我疑惑的表情，那個男人微笑回應：「我叫Marco，喺XXBank做緊IC (Investment Consultant)，同啊新娘子係舊同事，你呢？」

「我喺甩轆銀行做緊跑數妹，但點解你會知我叫咩名？我哋之前見過面？」

「哈哈，你等陣答啱我問題就話你知！」

嗯？咁奇怪？不過見他是金融才俊，應該不會是傻的吧！

「好啦，作為一個IC，我可以教你幾招點樣sell客，你有無興趣知？」

咦，無啦啦袋錢入我袋？

「都有啊。」

反正同枱沒有其他認識的人，不妨和他聊一下。

「好，我先問你幾個簡單問題，最近恆指升穿幾點？」

「三萬啊嘛。」

「嗯，咁你又知唔知上證指數幾點？滬深指數幾點？」我搖搖頭。

「唔知？咁你就要去conference call啦，哈哈！」

「......」

「嗱！作為一個IC，話你知，呢啲基本嘢，一定要記，一定要識答！」

我邊點頭，邊咬著一塊脆皮乳豬，Marco也邊咬著乳豬繼續講道：「兩年前上證指數5100點，我係IC我唔會呃你，你可以同個客咁講，而家3000點左右，所以有吸納嘅空間，我唔係話一定會升.......」

婚宴進行中，餸菜一碟一碟地端上，他說著說著，我發現了一樣很恐怖的事，就是他停不下來！

「......其實就算Powell上場，我作為一個IC，都唔覺得對個市會有好大影響......」

他，邊說邊吃，真的不怕啃骨嗎？！連本枱的其他賓客都向他投以怪異目光，但他完全不理外人眼光，專心一致教誨我。

「......作為IC，我睇好Bitcoin會繼續升，佢只會有越嚟越大嘅認受性......」

從指數談到美股，再從金價談到Bitcoin，終於上美點雙輝了！啊，太感動喇！我就快可以脫離這個喋喋不休的IC了！

「你要唔要攞啲橙返去？食多啲橙對皮膚好喎！」Marco終於不再談市況，邊說邊把橙放入袋。

「Er......唔駛喇......係呢，你仲未話畀我知，點解你知我個名？」

「因為我識傳心術！」

吓？！

「哈哈，講笑咋！我一入嚟就喺Reception見到你剔緊名，咁啱我哋又坐同一枱，我咪留意到你叫Bella囉！你住邊頭？咁夜不如我車埋你？」

「唔駛㗎啦，我自己搭車返去得啦！」

「哦，咁啊，不如我哋交換電話？方便第日你有咩投資嘢可以問我！」

日日返工都聽Market Update，就連去飲都要聽足成晚！大佬，你畀我抖吓啦！

「Er......不如下次先啦，我諗我聽咗成晚，都夠我消化一排㗎啦！」

撰文：

溫柔

欄名：銀行小妹甩轆記